Цөхрөлөөр бичигдсэн нэрс

 

Mystic River (2003) . 1975 он, Ирланд-Америк найз хөвгүүд болох Jimmy, Sean, Dave нар Бостоны гудамжинд тоглож байтал өөрсдийгөө цагдаа гэж нэрлэсэн хоёр хижээл насны хүрч ирээд хөвгүүдийн сахилгагүйтлээ хэмээн загнаад Dave-г машиндаа суулгаад аваад явчихна. Тэд цагдаа байгаагүй ба Dave 4 хоног хүчирхийлүүлж, тамлуулсны эцэст зугтааж чаддаг. 25 жил өнгөрчээ. Jimmy хотынхоо зартай атаман болсон бол Sean мөрдөгч болж, харин Dave хулгайлагдаж, хүчирхийлүүлсэн дурсамжиндаа шаналагч нэгэн болжээ. Jimmy, Dave хоёр эхнэрүүдээрээ хамаатан болсон буюу Dave-ын эхнэр Celeste болон Jimmy-ын хоёр дахь эхнэр Annabeth нар үеэлүүд болно. Jimmy-ын анхны эхнэрээс төрсөн охин Katie найз залуу Brendan-ын хамтаар Лас Вегас руу зугтахаар төлөвлөгөө байгаад гэнэт ор сураггүй алга болчихно; охиныг алга болдог шөнө Dave түүнийг бааранд найзуудтайгаа байхыг олж харсан байдаг. Ингээд Katie алагдсан байдалтайгаар олдож, харин Dave цус болсноор гэртээ ирнэ.

 Dave эхнэртээ хулгайчтай таарсан, цохиод алчихсан ч байж магад гэж хэлдэг. Sean энэ хэргийг мөрдөхөөр болох ба Jimmy хайрт охиноо алуулсандаа цөхрөн шаналж, цагдаад итгэхийн оронд өөрийн нөхдийн хамтаар хувиараа алуурчныг хайж эхэлнэ. Sean мөрдөх явцдаа охин алуурчныг таньдаг байсныг илрүүлээд зогсохгүй алуурчны ашигласан буу 1984 онд Brendan-ын аав Harris гэгч дэлгүүр дээрэмдэхдээ ашиглаж байсныг тодорхой болгоно. Мөн Harris гэгч нь 1989 оноос хойш сураггүй алга болсон ч гэр бүлд нь хэнээс ч юм сар бүр мөнгө илгээмжээр ирдэг нь сонирхолтой юм. Brendan аавынхаа бууг тувт үгүйсгэх бөгөөд харин Dave цус болж ирсэн шөнийнхөө тухай янз бүрээр ярих нь эхнэрийнх нь сэжгийг төрүүлж, улмаар Celeste нөхрөө охины аллагад сэжиглэж нөхрөөсөө зугтааж, Jimmy дээр очоод охиныг чинь нөхөр минь алчихсан бололтой гэж хэлдэг.

Jimmy нөхдийн хамт Dave-г барьж аваад зодонгоо байцааж эхлэх бөгөөд яриан дундуураа Jimmy Harris-г алснаа хэлдэг. Dave тэр шөнө хүүхэд хүчиндэгчтэй таараад хүчиндэгчийг алсан харин охиныг алаагүй гэж хэлдэг ч Jimmy хутга гаргаж ирээд охиныг алснаа хүлээн зөвшөөрвөл амьд үлдээнэ гэдэг ч Dave охиныг алснаа хүлээн зөвшөөрөх үед Jimmy түүнийг алдаг. Энэ зуур Brendan аавынхаа нуусан бууг олох ба дүүлий дүү нь найзтайгаа хамт Katie-г алсан байх магадлалтай болдог. Тэднийг зодолдож байх зуур Sean хүрч ирээд тэднийг баривчлах ба маргааш өглөө нь Sean Jimmy-тэй уулзаад охиныг чинь Brendan-ын дүү алсан, хэргээ ч хүлээлээ гэж хэлэхийн сацуу Dave-г хүүхэд хүчиндэгчийн үхэлд эрэн сурвалжиж байгааг хэлдэг; харин хариуд нь Jimmy "чи арай хурдан ажилласан ч болоосой" гэдэг.

 Америкийн нэрт жүжигчин, найруулагч Clint Eastwood ын найруулсан зэвүүн нео-нуар, гэмт хэрэгт драм ба Dennis Lehane-ын ижил нэрт романаас сэдэвлэсэн. Гол дүрүүдэд: Sean Penn, Tim Robbins, Kevin Bacon, Laura Linney нар тоглосон. Кино Оскарын наадамд 6 төрөлд нэр дэвшсэнээс шилдэг эрэгтэй гол дүрийг Sean Penn, шилдэг эрэгтэй туслах дүрийг Tim Robbins нар хүртсэн нь шилдэг эрэгтэй дүрийн хоёр шагналыг зэрэг хүртсэн түүхэн дэх 3 киноны нэг болсон; нөгөө кинонууд нь "Ben-Hur", "Dallas Buyers Club" юм. Clint Eastwood энэ кинон дээрээ анх удаа киноныхоо хөгжмийн зохиолчоор ажилласан ба киноныхоо уур амьсгал, агуулгыг хөгжмөөрөө гаргаж чадсан. Clint Eastwood найруулгын тухай мэддэг бүхнээ энэ кинонд ашигласан гэж судлаачид үздэг. Киноны үйл явдал сэмхэн өрнөж, тархи толгой гашилгаж байгаад дараа нь таныг нэг сайн чаддаг. Энэ бол сэтгэлд хоногшим, ховсдож чаддаг кино. Энэ бол Clint Eastwood-ын оргил ажлын нэг бөгөөд өнгөрсөний гэмт хэрэг одоогийн гэмт хэрэгтэй сэтгэлийн хувьд холбогдсон тухай хар бараан, заналхийлсэн бүтээл. Энэ киног шилдэг болгож байгаа нэг чанар бол хүний сэтгэл хөдлөлийг бодитоор гаргаж чаддаг сайн жүжигчдийг олж тоглуулсанд орших ба тэд гүн гүнзгий харагдуулж, шударга өвдөлтийг мэдрүүлж чаддаг. Киноны элементүүд цагдаагийн процедур маягаар тоглогддог ч энэ кино нь гэм буруугийн энгийн асуултаас ч илүүтэй бөгөөд энэ кино бол олон жилийн туршид тойрон эргэлдэж буй өвдөлт, яригдаагүй нууц, сэжигтэй байдлын тухай юм. 

Мөн нөхөр, эхнэрүүдийн хувийн үнэнч байдлын тухай юм. Jimmy-ын эхнэрийг Шекспирийн "Макбет" жүжгийн хатан Макбеттай харьцуулах явдлууд байдаг. Энэ нь энэ эхнэр ямар ч тохиолдолд Jimmy-д үнэнч гэдэг нь харагдаж байгаа бол Dave-ын эхнэр үргэлж нөхөртөө эргэлзддэг; нэг эхнэр нь үнэнч бол нөгөөдөх нь нөхрөөсөө сэтгэлийн хувьд дэндүү хол байгаа нь харагдаж байна. Кино эцэстээ шийдэлд хүрдэг ч энэ бол шийдлийн тухай кино биш юм. Энэ бол аяллын тухай кино ба жүжигчид өөрсдөд оногдсон сцэнүүдээрээ өөрсдийнхөө хязгаарыг харуулдаг. Нойтон бетонон дээр нэрээ бичиж тоглож байсан хөвгүүд дээр гаж донтонгууд ирснээр тэдний амьдрал эгнэгт өөрчлөгддөг буюу тэр хар өдөр үүрд тэдний дурсамжинд үлддэг. Dave-д яг юу тохиолдсоныг хоёр найз нь бүрэн ойлгоогүй байж болох ч тэд үргэлж Dave-ын талаар бодож, энэ нь тэднийг тавгүй болгодог нь тодорхой байдаг. Энэ нь Clint Eastwood-ын найруулсан 24 дэх кино бөгөөд өөрөө тоглоогүй цөөхөн киноных нь нэг юм. Хүчтэй жүжиглэлттэй, өнгөрсөн ба одоог эвлүүлгийн хэмнэлээр гайхалтай холбосон кино.