Лев Толстой "Анна Каренина"

Гайт Коронавирус гарахаас өмнө Монголд Л. Толстойн "Анна Каренина" классик романыг драмын тайзнаа анх удаа тавихаар болж, Анна-д хэн тоглох бол гэсэн хүлээлт үүсгээд байсан билээ.. миний ээж драмын жүжигт дуртай тул мартын 8-г тохиолдуулан уг жүжгийн билетээр ээждээ (мөн бас нэг бүсгүйд) бэлэг барихаар шийдэж үүнийгээ ч өөрт нь хэлсэн байдаг юм. Ээж маань үүнд хэр их баярласныг хэлэх хэрэггүй ба ядаж байхад Анна-д ээжийн дуртай жүжигчин тоглохоор сонгогддог юм байна.. ээж маань Л. Толстойн классик романыг залуудаа уншсан билүү? Яалаа гэж ихээхэн төөрөлдөж байна, юутай ч Оросын нэг киног үзсэнээ санаж байна, хүүхэн нь их гоё л гэнэ, гэхдээ киногоо сайн ойлгоогүй шинжтэй.. би ч өөрт байгаа хуучин хэвлэлийн "Анна Каренина"-гаа ээждээ санал болгосон буюу чин үнэндээ ээж маань номыг маань уншъя гэсэн агаад романыг нь уншчихаад жүжгээ үзвэл илүү дээр гэж хэлснээр ээж маань нэлээн зузаан романыг барьж авлаа шүү.. 

 хоёр гурван хоног өнгөрлөө, би ээжээсээ яаж байна хэмээн ойлгож байгаа болов уу гэсэн өнгөөр асуухад ээж энэ Анна нэг л их дурласан хүүхэн гэж дурамжхан хариулж байсан юм.. тэрнээс хойш коронавирус бүгдийг мэдэх болсон ба ээж лав номоо хавьд барьж харагдаагүй шүү.. "Анна Каренина" бол сонгодогуудын сонгодог ба "Анна Каренина"-аар хийсэн юмуу сэдэвчилсэн кино хар мянга, театрын жүжиг хэдэн зуу, хөгжимд болон яруу найрагт нөлөөлсөн хүч нь үлэмж бөгөөд."Анна Каренина" бол зөвхөн урлагийг мөнхөд эзэгнээд зогссонгүй спорт, нийгэм гээд халдаж ороогүй зүйл байхгүй агаад энэ роман бол хүн төрөлхтөний мөнхийн классик бүтээл юм.. 

их зохиолч Л. Толстой анх 1873 оноос 1877 оны хооронд The Russian Messenger сэтгүүлд цувралаар хэвлүүлж байгаад 1878 онд роман болж хэвлэлтээс анх гарчээ.. Роман арав гаран томоохон дүртэй (мэдээж гол хоёр дүр нь Анна Каренина болон Константин Левин хоёр) бол 8 бүлгээс бүрдэх ба орчуулга хийгээд хэвлэлээсээ хамаарч 800 орчин хуудастайгаар хэвлэгддэг бөгөөд голдуу 2 боть хэлбэрээр байдаг.. олонхи зохиолчид "Анна Каренина"-г уран зохиолд төрсөн хамгийн аугаа туурвил гэж үздэг, харин Л. Толстой уг романаа өөрийнхөө анхны жинхэнэ роман гэж хэлсэн буй.. романы ухвар санаа нь хууран мэхлэлт, итгэл, гэр бүл, гэрлэлт болон Хаант Оросын нийгэм, хүсэл тачаал хийгээд хотын амьдралын эсрэг хөдөөгийн амьдрал гэсэн үлэмж цар хүрээг хамарсан, маш гүн гүнзгий бөгөөд хүмүүний амьдралыг бүхий л явдалыг багтаасан философийн бүтээл (энэ миний бодол) гэж хэлж болно, нэг үгээр уг романд хөндөөгүй, агуулаагүй хүмүүний асуудал бараг үгүй тул хүн болгон заавал унших ёстой бөлгөө.. гэхдээ зарим судлаачид Л. Толстой романдаа моралийн асуудлыг хөндөөгүй гэж үздэг, харин Оросын амьдралыг өргөнөөр, уудмаар дүрсэлсэн гэжээ.. мөн романы гол "түлхүүр" бол хэн ч гэсэн өөрийнхөө аз жаргалаа бусдын зовлон дээрээс босгож болохгүй гэсэн санаа юм гэжээ.. романы гол мотиф бол Оросын эзэн хаан Александрын эхлүүлсэн либерал шинэчлэлийн үр дүнд хурдацтай өөрчлөгдөж буй үйл явдлын эсрэг буюу энд төмөр зам, галт тэрэг нь уг шинэчлэлийн үндсэн мотиф болдог.. Л. Толстойн бичлэгийн хэлбэрийг модернист хийгээд реалист романы хэлбэрийг холбосон гүүр буюу шилжилтийн үе гэж үздэг ажээ.. Левиныг Л. Толстой өөрийн амьдралын итгэл үнэмшил, тэмцлээс бий болгосон хагас намтарчилсан "хөрөг" дүр гэж үздэг бол Аннагийн дүрийг А. Пушкины охин Мариа Гартунгаас санаа аван бүтээсэн гэлцдэг.. романы турш Левины баримталдаг үзэл бодол Л. Толстойн үзэл бодолтой таардаг гэж мөн үздэг бөгөөд Левины Китти-д хуримлах санал тавьдаг арга зохиолчийн эхнэр Софья-д тавьсан хуримлах саналтай ижилхэн байсан гэдэг ажээ.. 

романы хүүрнэгч нь бүхнийг мэдэгч, нэргүй, гурөвдагч биеэс өгүүлэх ба энэ нэргүй хүүрнэгч нь романы ямар ч дүр мэддэггүй баримт болон дүрүүдийн дотоод бодлыг хүүрнэнэ.. голчлон Анна болон Левин хоёрын бодол, мэдрэмж хийгээд хандлагыг дүрслэх боловч зарим тохиолдолд бусад дүрүүд рүү орох ба романы 7-р бүлгийн сүүлээс хүүрнэгч шууд Аннагийн бодлыг дүрсэлж эхэлдэг.. тухайн үеийн ихэнхи реалист романы адилаар хүүрнэгч эзэн биегүй ч энэрэгч байдлаар бүхнийг тайлбарлана.. мөн дүрүүдийн хувь тавилан зохиолчийн тайлбараар биш баримт болон мэдрэмж хоёр дээр төвлөрнө.. 

Романы эхний өгүүлбэрийг эс тооцвол уг роман нь Л. Толстойн эхэн үеийн "Дайн ба Энх" зэрэг бүтээлийг бодвол философийн илэрхий "журамгүй" гэдэг.. романы гол зөрчил бол Аннагийн Вронскийд тэмүүлэх хүсэл болон бие даасан байх хүсэл хоорондын тэмцлээс гадна түүний ээж хүний үүрэг хариуцлагын асуудал, мөн нийгмийн уламжлалт хандлагын эсрэг, бусдад хайрлагдсан ээж хүний төрхөөсөө салж буй асуудал ба нөгөө талд нөгөө гол дүр Левины мөн чанараа олох гэсэн, хэн гэдгээ мэдэх гэсэн тэмцэлийн сацуу ертөнцийг ойлгох гэсэн хүсэл хийгээд ганцаардан төөрөлдөж буйгаа ойлгосон явдал юм.. үйл явдлын өсөлт нь Анна, Вронский хоёрын галт тэргэний буудал дээр танилцахаас эхэлж, санамсаргүй уулзалт хайраар жигүүрлэсэн завхайралд хүргэхийн дээр гэр бүлийг салгаж, уг хууль бус янагийн асуудал Аннаг нөхөр болон хүүгээ орхиход хүргэдэг.. энэ үед Китти Левины гэрлэх саналаас татгалзана, учир нь хүүхэн түүнийг хөдөө нутгийнхаа өөрийн гэсэн эзэмшил газраа эргүүлэн авч амьдралд хариуцлагатай ханд гэхээс гадна амьдралын утга учрыг тунгаан бод хэмээдэг.. 

романы оргил хэсэг бол Анна дуурийн театрт олны өмнө үзэгдэх буюу өөрийнхөө амьдралыг хүсэл тэмүүллийн эсрэг зогсох түүнд дургүй дайсагнагч Петербургийн нийгэмтэй хүчээр нүүр тулах ба энэ хэсэгт тэрээр нийгмээс гадуурхагдсан, бүрэн баларч дууссан эмэгтэй болдог.. харин энэ үед Левины амьдралын утга учрыг хайсан эрэл Китти-тэй гэрлэх "урамшуулал" олгож, улмаар Левин итгэл найдвараа ухамсарлаж, тогтвортой гэр бүлийн амьдрал зохиодог.. үйл явдлын уналтад Анна амиа хорлоно.. тэрээр хардалт болон Вронскийтэй үүсгэсэн тогтворгүй харилцаанаас болохын сацуу нийгмийн хүрээндэх эрх чөлөөгүй байдлаасаа болж амиа хорлох ба нөгөө талд Левин гэгээрсэн нөхөр, эцэг болон газрын эзний шинэ амьдоалаа үргэлжлүүлсээр байна.. 19-р зууны Оросын нийгмийн өөрчлөлт, гэр бүлийн аз жаргал, хөдөөний амьдралын үнэ цэнийг философийн үүднээс мундаг гаргасан бүтээл бөгөөд бид эл романаас уучлалт, завхай амьдралын талаар ойлгон мэдэж хийгээд олон дүрийн олон дотоод ертөнцөөр аялах болно.. романы симбол нь галт тэрэг, Вронскийгийн хурдны морь хийгээд Левин болон Киттигийн гэрлэлт болой.. романы урьдчилсан мэдэгдэл бол анх Аннаг галт тэргэний буудал дээр ирэхэд нэг хүн үхэж байдаг агаад энэ бол Аннагийн өөрийнх нь үхлийн зөгнөл бол Вронскийн морь үхдэг хэсэг бол мөн л Аннагийн үхлийн зөгнөл юм.. 2007 онд "Анна Каренина" романыг 125 зохиолчид бүх цаг үеийн хамгийн аугаа романаар нэрлэсэн бол Достоевский уг романыг урлаг шиг өө сэвгүй гэсэн байхад Набоков Толстойн ид шидээр бүтсэн төгс бүтээл гэсэн байдаг бөгөөд Фолкнер хамгийн шилдэг зохиол гэсэн байдаг ажээ.. сонирхуулахад, романы үйл явдал болж буй цаг үед эхнэр нөхөр хоёр салах нь эдийн засгийн хувьд асар хохиролтойгоос гадна нийгмийн өмнө нэр нүүргүй болдог байсан ба уг асуудлыг шийдэх буюу салах 3 арга байсан агаад: 1-т эхнэр юмуу нөхрийн аль нэг нь алга болох, эсхүл аль нэг нь хөдөлмөрийн чадвараа алдаж тахир дутуу болох, эсвэл нийгмээс ирэх дарамт, доромжлолыг тэвчин тэр чигээрээ завхайрах ажээ..

ҮНДСЭН САНАА. Толстой 18-р зууны сүүлчээр Орос даяар өрнөсөн асар том түүхэн өөрчлөлтийн эсрэг завхайрал болон өөрийгөө олж авах тухай өгүүлэхдээ, романдаа түүхэн талыг чухалчилсан шигээ хувь хүн болон сэтгэлзүйн талыг онцлон харуулсан. "Анна Каренина" романы Орос улсад газрын эзэд язгууртнуудыг дэмждэг хуучны патриарх үнэт зүйлс ба шинэ, либерал хэмээгддэг, роман дээр ихэвчлэн "чөлөөт сэтгэгчид" гэж нэрлэгддэг барууны үзэлтнүүдийн хооронд тулаан өрнөдөг. Хуучин цагийн консервативууд нь боолчлол, авторитар засаглал гэх мэт уламжлалдаа итгэдэг бол барууны үзэлтэй либералууд нь технологи, рационализм ба ардчилалд итгэдэг. Барууныхны хөдөө аж ахуйн шинэчлэлийг хүлээн зөвшөөрөхөөс татгалзаж хөдөө аж ахуйгаа эрхлэх Оросын хуучны арга барилыг хамгийн шилдэг нь гэж үздэг Левин тариачидтайгаа хамт уг асуудалтай тулгарч буйг уншигчид харж байна. Стивагийн оройн зоогт ирсэн зочид эмэгтэйчүүдийн эрхийн тухай асуудлыг хөндөж байна; энэ бол өнөөгийн халуухан сэдэв гэдэг нь тодорхой ба барууны нийгмийн дэвшил нь Орос улсад хэрхэн нөлөөлж байгааг харуулж байна. Анна, Долли нар гэрлэлтэндээ зовж шаналж байгаа нь уг романы ертөнцөд феминизм нь ирээдүйд сайнаар нөлөөлөхгүй. "Анна Каренина" романы ертөнцөд романтик харилцааны хандлага тодорхойгүй байдаг. 

Оросын уламжлалт гэрлэх ёс моодноос гарч байгаа ч хатагтай Шербацкая Китти-д ханиа өөрөө сонгохыг зөвшөөрч байгаа даа ихээхэн санаа зовж байна. Хүүрнэгч 1870-аад оны Орост залуу хүмүүс хэрхэн гэрлэх ёстойг хэн ч хэлж мэдэхгүй байсан гэдгийг тодорхой хэлдэг. Энэхүү бүх төөрөгдөл нь уламжлалыг бүдгэрүүлж, хүн төрөлхтөн хэрхэн амьдрахаа дахин шийдэх ёстой гэсэн тогтворгүй бөгөөд  шинэ боломжийн орчин ахуйг бий болгоно. Зөвхөн энэ өөрчлөгдөж буй орчин ахуй дотор л Левиний философийн асуултууд боломжтой болдог. "Анна Каренина" олон талаараа 1870-аад оны үед загвараас гарсан, хэдэн арван жилийн өмнө Орост алдартай байсан "гэр бүлийн роман"-ыг санагдуулахуйц ухралт хийдэг. Оросын гэр бүлийн роман нь гэр бүлийн эв нэгдэл, аз жаргал ба гэр бүлийн ашиг тус болоод ая тухтай амьдралыг төгс төгөлдөр байдлаар хөрөглөдөг ажээ. 1860-аад оны Орос улсын нийгмийн уур амьсгал эрс өөрчлөгдөж байхад нийгмийн дэвшилтэд хэсэг гэр бүлийн институтид халдсан бөгөөд үүнийг ухарсан, хоцрогдсон, хувь хүний эрх чөлөөг хязгаарлагч гэж нэрлэх болжээ. Тэд гэр бүлийг хүүхдүүдийг хямдхан ажиллах хүч болгон мөлждөг гэж мэдэгдсэн ба уг роман ч энэхүү гэр бүлийн маргаанд нэгддэг. Гэр бүлийн аз жаргал ба аз жаргалгүйн тухай бичсэн романы эхний өгүүлбэрт энэ санааны гол агуулгыг онцолжээ.

 МОТИФ. Толстой энгийн бөгөөд шулуухан бичдэг гэдгээрээ алдартай зохиолч боловч үнэндээ хэв маягийн хувьд шинийг санаачлагч байсан. Тэрээр 19-р зуунд эрс шинэ бүтэц боловч эдүгээгийн романуудад түгээмэл хэрэглэгддэг дотоод монологийг анхлан ашиглажээ. Дотоод монологи бол зохиолчийн дүрийн оюун санааг тоймлох юмуу тайлах биш харин дүрийн бодол болон мэдрэмжийг шууд дүрслэх явдал юм. Шекспир гэх мэт эртний зохиолчид монологийг жүжигт ашигладаг байсан бөгөөд энэ нь дүрүүд үзэгчид руу хандан ганцаараа юмуу тусдаа байдлаар ярих үзэгдэлд гардаг байв. Зохиомол хүүрнэлийн хувьд зохиолчид Толстой "Анна Каренина" романдаа ашигласан шиг дотоод монологийг урт хугацаагаар ашиглах нь ховор байсан ба дотоод монологи нь уншигчдад дүрийг ойлгох мэдрэмжийг өгдөг. Бид хэн нэгэн хүний бодол, мэдрэмж, сэтгэл хөдлөлтэй хамт байснаар алхам алхмаар тухайн хүний сэдэл, санааг илүү дотноор ойлгох мэдрэмжтэй болдог. 

"Анна Каренина" романд, Толстой бидэнд Левиний дотоод монологиор түүний амьдралын тодорхой чухал мөчүүд рүү нэвтрэн орох боломж олгодог; Китти түүний эхнэр болохоо зөвшөөрөхөд түүний хайрын сэтгэлдээ жаргаж байгаа, тариачидтайгаа хадлан дээр ажиллахдаа бие махбодийн баяр хөөр эдэлж байгаа, Китти төрөх үедээ өвдөж байхад түүний айдсыг бид мэдэрнэ. Гэхдээ Толстой романы долоодугаар бүлгийн төгсгөлд, галт тэрэгний буудал руу явж байгаа Аннагийн эцсийн мөчийг дүрслэхдээ дотоод монологийг илүү өргөн бас сэтгэл хөдөлгөмөөр ашигладаг. Хэрэв уншигч түүний бодолд нэвтэрч чадахгүй бол Аннагийн амиа хорлолтын шалтгааныг хялбараар ойлгох болно. Дотоод монологи үгүйгээр бол Аннагийн үхэл Оросын уран  зохиолд нийтлэг байсан хайр сэтгэлээс болж үхэж буй олон эмэгтэй дүрүүдийн нэг байх болно. Аннагийн монологийг уншиж байхдаа бид, үсчний инээдтэй нэрийг тайлбарлахын тулд уйтгартай бодлоо тасалдуулж байгаа шиг түүнийг романд ийм тод хувь хүн болгож байгаа амьд, хошин байдлыг харж байна. Анна өөрөө өөртөө дарамт болж байгааг уншигчид харах агаад тэр Вронскийгоос, мөн өөрөө өөрөөсөө ангижрахыг мөрөөддөг. Дотоод монологи нь Аннагийн амиа хорлосныг улигт байдлаар харуулдаггүй, харин энэ бол өөрийгөө чөлөөлөх гэж оролдохдоо өөрөө өөрөөсөө ангижирч байгаа энгийн бөгөөд зүрх эмтрэм оролдлого юм. 

"Анна Каренина" бол завхайрлын тухай роман гэдгээрээ алдартай; Аннагийн нөхрөөсөө урвасан явдал нь зохиолын шугамын гол үйл явдал болно. 19-р зууны дунд үед завхайрлын сэдвийг ихээхэн сонирхож байсны том жишээ бол Гюстав Флоберийн  "Бовари хатагтай" роман юм. Хэдийгээр эдгээр бүтээлүүдийн гэм буруутай тал нь үргэлж буруутай үйлдлийнхээ үр дүнд баларч байгаа эмэгтэй хүн байдаг боловч 19-р зууны завхайрлын роман нь бодож байгаагаас бага шашны ёс суртахуунтай байдаг ба уг роман бол үүний тод жишээ болно. Хэдийгээр романы эпиграфаас болон дүрүүдээс Библийн ишлэлүүд гардаг боловч ёс суртахууны уур амьсгал нь ихэнхдээ Христиан бус байдаг. Үнэндээ, хатагтай Стахл, Лидия Ивановна зэрэг олон Христиан сүсэгтнүүд романд гардаг ч тэд хоёр нүүртэй, хорон дүрүүд юм. Толстой уг романдаа сүмийн тухай бараг дурддаггүй ба хааяа нэг дурдахдаа хөнгөхөн шоглодог агаад завхайрлын талаарх шашны буруутгал нь мэдээжийн боловч тийм ч хүчтэй биш юм. Романд завхайрлыг буруушаах нь сүмээс биш харин нийгмээс ирдэг; завхайрал нь ёс суртахууны, шашин шүтлэгийн бус илүүтэй нийгмийн асуудал ажээ. Аннагийн Вронскийтой үүсгэсэн харилцааг эсэргүүцэх Карениний гол шалтгаан бол завхайрлын тухай нүгэл юмуу өөрт нь учруулсан сэтгэлийн зовлон биш харин нийгмээс ирэх сөрөг хариу үйлдэл болно. Каренинд юу юунаас илүү бусдад зөв зохистой бас ёс суртахуунтай харагдах явдал ба тиймээс ч тэрээр Анна салахаар хөөцөлдөөгүй бол эхнэрийнхээ бузар явдлыг тэвчин өнгөрүүлэхэд бэлэн байдаг. Түүнд эхнэр нь өөр эр хүнд хайртай болсон эсэх нь хамаагүй, гол нь сайн эхнэр хэвээрээ үлдэх нь л чухал байдаг агаад уламжлалт нийгмийн хязгаарлалт энэхүү хүч Аннагийн зэвүүцдэг бас зугтахыг хүсдэг зүйл буюу тэрээр эхлээд Итали, дараа нь хөдөө нутагт очдог. 

 Тиймээс роман дахь завхайрал нь нийгмийг боомилж буй хүчирхийлэлийн сөрөг нөлөө бөгөөд роман нь гэр бүлээсээ урваж байгааг шүүмжилж байгаа шигээ нийгмийн шүүмжит бүтээл болно. Христийн өршөөлийн идеа "Анна Каренина" романы туршид гардаг ба энэ бол Толстойн бүтээлийн гол сэдвийг нэг бөгөөд хэрэв зохиолын үндсэн үйл явдал нүгэл юм бол өршөөл нь шийдвэрлэх боломж юм. Хэрвээ Анна нүгэлтэн юм бол дараа нь түүнд болон романд хандах уншигчдын хандлага Аннаг уншигчид хэр их уучилж чадах эсэхээс хамаарна. Толстой Христийн шашны ёс суртахууныг ухамсаргүйгээр хүлээн зөвшөөрдөггүй, гэхдээ өршөөх нь боломжтой, үр ашигтай юу гэдгийг бодохыг шаарддаг. Романы эпиграфт "өшөө авалт бол минийх; Би эргүүлж төлнө"  гэдэг буюу өршөөхийн эсрэг өшөө авалтыг үнэлдэг. Энэхүү сэтгэлд хоногшим эхлэл романы туршид оршин, өршөөх нь эцсийн эцэст хамгийн сайн ёс суртахуун биш гэдгийг харуулж байна.

Анна Каренина дүрийн анализ

Романы хоёр гол баатрын нэг (нөгөө нь Константин Левин) Анна бол хүйтэн хөндий, хүсэл тэмүүлэлгүй төрийн албан хаагч Алексей Каренинагийн үзэсгэлэнтэй, цог жавхаатай, боловсролтой эхнэр юм. Аннагийн зан араншин нарийн түвэгтэй байдлаар баялаг; жишээлбэл, тэр гэр бүл, гэрлэлтээ гутаасан буруутай боловч эрхэмсэг бөгөөд бишрэм хэвээр байдаг. Анна ухаалаг, их юм уншсан, Англи хэлээр роман уншдагийн сацуу хүүхдийн ном бичдэг хүн. Тэрбээр ганган дэгжин ба өмсөх даашинзаа үргэлж нарийн тааруулдаг. Тэрээр олон жил үлгэр жишээч, гоё сайхан, соёлтой гэрийн эзэгтэйн дүрд чадварлаг тоглож чадвартай гэдгээ харуулдаг. Анна бол 1870-аад оны үеийн хамгийн төгс Орос язгууртны эхнэр гэж хэлж болохуйц бөлгөө. Аннагийн хамгийн чухал чанар бол түүний сэтгэл зүрхний хүсэл тэмүүлэл агаад өөрийнхөөрөө амьдарч чадах шийдвэр төгс чанар юм. Тэр бол нэг төрлийн феминист баатар юм. Хэдий тэрээр нэр төрөө алдсан байсан ч дуурьт очин Санкт-Петербургийн нийгмийн дээд зиндааныхнаас ирэх тоог тохуу хийгээд доромжлолыг мэдэж байсан ч үүнтэй нүүр тулахаар зориглож, буруутгагдсан нөхцөл байдлаасаа хамаарч зугтахаас татгалздаг. 
Анна нь эртний Оросын эцгийн эрхт ёсны тогтолцоо болоод эрэгтэй, эмэгтэй хүмүүсийн садар самууны завхайрлын тогтсон жишигт зовогч болой. Түүний ах Стива нь ёс суртахууны хувьд илүү сул байдаг боловч хүүхэмсэг байсныхаа төлөө хэзээ ч буруутгагдаж байгаагүй байхад Анна нийгмээс цөллөгдөж, амиа хорлох шийтгэл хүлээдэг билээ. Үүнээс гадна Анна гэр бүл, үр хүүхэддээ чинь сэтгэлээсээ ханддаг; хүүгийнхээ төрсөн өдрөөр нь уулзахаар хуучин гэртээ нууцаар ордогийг бид мэднэ. Тэрээр нөхрийнхөө салах саналаас татгалзсан цор ганц шалтгаан нь хүүгээ алдах явдлаас зайлсхийсэн арга байсан буюу салалт түүнд эрх чөлөө авчрах байсан ч тэрээр хүүгээсээ хагацахыг хүсдэггүй. Аннагийн амьдралдаа мөрддөг зарчим бол хайр бүхнээс хүчтэй зүйл, бүр үүрэг хариуцлагаас ч илүү хүчтэй байдаг ба тэр өөрийнхөө энэ зарчимд тууштай байдаг. Гэр бүл болон гэрлэлт нь гаднасаа бүрэн бүтэн харагдаж, дүр эсгэн тогтвортой амьдаръя гэсэн Алексейгийн саналаас тэрээр татгалздаг. Вронскийтой харилцах харилцааны сүүлчийн үе шатанд Анна өөрийг нь Вронский хайрлахаа больж, зөвхөн түүний өмнө хүлээсэн үүргийн үүднээс л өөртэй нь хамт байна гэж туйлаас зовдог. Романы төгсгөл хэрд Аннаг соёлжсон нийгмээс хөөсөн нь бидний ердийн байдлаар дуулгавартайгаар дагадаг нийгмийн бүхий л ёс заншлыг бэлгэдлээр няцаасан хэрэг юм. Тэр ганцаардсан зүрх сэтгэлээ дагахаар шийддэг. Үүний үр дүнд, романы сүүлчийн бүлэгт Левиний бурхан болоод сайн сайхны төлөө амьдрах үзэл санааны эсрэг Анна нь амин хувиа хичээж буйгаар хоёр дүр эсрэгцэж харагдаж байна. Анна зүрх сэтгэлийнхээ тушаалыг дагаж амьдрахаар шийдсэн нь түүнийг эрчүүд давамгайлсан нийгэмд хүсэл эрмэлзлэлээ, бие даасан байдлаа эрэлхийлсэн анхны эмэгтэй хүн болгож байна. 

Алексей Вронский дүрийн анализ

Алексей Вронский. Роман дээр Вронский царайлаг, баян, сэтгэл татам эрийн дүрээрээ Анна шигээ хайрынхаа төлөө нийгмийн байр сууриа, мэргэжлийн статусаа орхидог. Эмнэлэг барих гэсэн түүний тууштай хүсэл нь бидэнд түүний сайн сайхны төлөө гэсэн сэтгэлтэй романтик хүний дүрслэлийг өгдөг. Гэхдээ роман дээр Вронский нь сул талтай, олон алдаа дутагдалтай болохыг цаг үргэлж сануулах ба өөрөөр хэлбэл Вронский нь бодит дүртэй ижил алдаа оноотой хүн юм. Түүний шингэхэн үс, морины уралдаан дээрх алдаа болон түүний цэргийн алдар нэр олох гэсэн зөрүүд амбиц зэрэг нь Вронскийг баатар биш, жирийн л нэг эр хүн болгож байна. Энэ дүр Аннагаас эсрэгээр нь, тэрээр нийгмийн дарамтаас зугтахыг бэлгэдэггүй ба учир нь, тэрээр өөрөө энэ дарамтад зовогч юм. Вронскийгийн энэ хязгаарлагдмал чанар Аннагийн урам хугаралтыг үүсгэх бөгөөд Аннагийн хүсэл эрмэлзэлэээр дүүрэн, хайрынхаа төлөө үхэж чадах тийм хүчтэй сэтгэлд Вронский даанч хүрдэггүй ба үүнийг Анна мэдээд сэтгэлээр унана. Л. Толстой зориуд Вронскийг ч тэр Каренинаг ч тэр Алексей гэдэг нь учиртай ба Аннагийн хувьд энэ Алексей нэр ерөөсөө бүтэлгүй, сэтгэл дундуур байдлыг илтгэнэ. 
Вронскийн Аннад хайртай, үнэнч байгаа нь романы төгсгөлийн бүлгүүдэд буурч байгаа мэт санагдавч энэ нь үнэндээ Аннагийн хардалттай буюу Вронскийг өөр хүүхэнд хайртай гэсэн хий айдсаас үүдэлтэй болой. Вронский хэзээ хэзээнээсээ илүү түүнд анхаарал тавьж буй нь Аннаг аз жаргалтай болгохын төлөө хөдөөний гэрээ томсгон тансаг, гоёмсог болгож байгаагаас харагдах агаад захиалгаар Аннагийн хөрөг зургаар гэр орноо чимэх гэсэн сэтгэл нь түүний хүүхэнд татагдсаар буйг илтгэнэ. Вронский үе үе сэтгэлийн хямралд орох буюу их сургуулийнхаа нөхөдтэй уулзах үеэр ялангуяа түүний цэргийн замналынхаа төлөө зүтгээгүй нь өөрийн нь зовооно. Тэрээр яаж ч бүтэлгүйтсэн Аннагийн өмнө хариуцлага хүлээдэггүй бөгөөд Вронский Аннагийн гоо сайханд болон хий хардалтад өөрийгөө тааруулан алив бүхнийг тэвчээртэй хүлээн авдаг. Аннагийнхаар бол Вронскийн сэтгэл хайр гэхээсээ илүү үүрэг, хариуцлага юм. Тэгэхдээ, роман Аннагийн бодлыг ховор харуулдаг шиг Вронскийн бодлыг бага харуулдаг ба бид түүнийг үнэндээ бүрэн мэдэх боломжгүй юм.