Гүнж ба оёдолчин

Love Me Tonight (1932). Парисын оёдолчин Maurice бол язгууртнуудын хувцсыг оёдог, язгууртнуудын итгэлийг олсон чадварлаг эрээс гадна хүүхнүүдийн учрыг олчихдог хөгжилтэй, сүйхээтэй эр ба орон нутгийн язгууртан Varèze гэгчтэй авлагын тооцоотой болсон учраас өрөө авахаар Парисын ойролцоо орших гүн d'Artelines-ын шилтгээн рүү явж байгаагаар кино маань эхэлнэ.. хөгшин гүн d'Artelines баян тансаг шилтгээндээ зээ охин Valentine болон мөн зээ охин – гүнж Jeanette гэсэн үзэсгэлэнтэй охидын хамтаар амьдрах бөгөөд охид хоорондоо өрсөлдөнө.. тэдэнтэй хамт Varèze болон Savignac гэсэн ноёд ирж яван хамт амьдрах ба хөгшин гүнгийн дүү Varèze бол шалиг, асар их үрэлгэн, найгүй өр тавигч бол Savignac гэгч нь гүнж Jeanette-д санаатай ч хэтэрхий хөгшин нэгэн агаад гүн d'Artelines үрэлгэн дүүгээ байнга зэмлэх бол Varèze ахаасаа айх учир ахыгаа тувт мэхэлнэ.. 

шилтгээн орох замдаа Maurice зугаалж явсан Jeanette-тэй учран анхны харцаар дурлачихна, гүнж гэж мэдэхгүй тул тэрээр хүүхнийг баахан эргүүлж, хоргооход амьдралдаа ийм юм үзээгүй Jeanette үүнд анхандаа эгдүүцэх хэдий ч зүрх сэтгэл нь дурлалын сумд оногдсоныг ухааралгүй яагаад байгаагаа ойлголгүй шаналсны улмаас бие нь өвдөж эмч дуудах агаад эмч гүнжийг үзээд ийм залуу бүсгүй нөхөрт гарах хэрэгтэй, энэ бол цэвэр уйтгараас үүдэлтэй хэмээнэ.. гүнж гурван жилийн өмнө бэлэвсрэхдээ нялхаараа байсан бол нас барсан нөхөр нь өвөө шиг нь хүн байсан бөгөөд Jeanette анх удаагаа дурлал гээчийг үзэж байгаан энэ..

ингээд гүнжийг нөхөрт гаргах асуудал шилтгээнд босч ирэх ч даанч гүнжтэй нас, зэрэг зиндаа ойролцоо хүн олдохгүй бөгөөд хөгшин Savignac өөрт нь боломж гарахнуу хэмээн урдуур хойгуур нь гүйнэ.. энэ үед Maurice Varèze-ээс мөнгөө авахаар шилтгээнд ирэх ба хувхай хоосон бас өртэй гэдгээ ахдаа мэдэгдэхээс айсан Varèze Парисын оёдолчинг эндээ түр үлдвэл мөнгийг нь яаж ийгээд олж өгнө, гол нь ахад мэдэгдэхгүй байхыг гуйх ба холоос ирсэн Maurice үүнд мэдээж дургүйцэх боловч сэтгэлтэй болсон Jeanette-аа хараад зөвшөөрөх бөгөөд Varèze түүнийг ахдаа болон шилтгээнийхэнд барон гэж худлаа танилцуулна.. 

тийнхүү оёдолчин маань бароны дүрд тоглож эхэлнэ, гүнж бардам зандаа хөтлөгдөн түүнийг тоохгүй хэвээрээ байх бол Valentine хуурамч баронд дурлачих агаад үүнд гүнж хардаж зовно.. нэг өдөр тэд бүгдээрээ ан авд гарна, энэ үеэр Maurice Jeanette хоёр хоёулахнаа үлдэх боломж гарсанаар зүрх сэтгэлээрээ уулзан дотносох ба дараагийн аминчихан уулзалт болох үдэшлэгийн үеэр тэд гар гараасаа барилцаж байгаад янаг хайраа илчилцгээх бөгөөд гүнж оёдолчинд хандан: чи хэн ч байсан, юу ч байсан, хаана ч байсан би чамайг хайрлах болно гэж хэлдэг.. гүнжийн эл үг Maurice-д үнэн төрхөө илчлэх зориг төрүүлэх ба адал явдал удаан үргэлжилдэггүй ёсоор оёдолчин жинхэнэ байдлаа илчлэхэд шилтгээн тэр аяараа доргиж, гүнж гүн цочролд орох агаад хөөрхий болсон Maurice ирсэн замаараа сурсан дуугаа дуулаад буцна.. 

Энэхүү комеди, мюзикл романс нь René Clair болон Lubitsch нарт нөлөөлсөнөөс гадна тэдний бүтээлүүдтэй харьцуулагддаг ба уг кино зарим нэг шинэчлэлийг кино урлагт авчрахдаа загварлаг байдлаар нэвтрүүлсэн, тухайлбал анхны томруулдаг линз ашигласан кино юм.. Армен – Америкийн кино найруулагч Rouben Mamoulian хөдөлгөөн, бүжиг, жүжиглэлт, дуулалт, хөгжим, тайз засал хийгээд гэрэлтүүлгээр өөрийн хүсэл эрмэлзлэлийг илэрхийлсэн бөгөөд эл бүтээл бол гарцаагүй  кинонд байх бүх шинжийг агуулсан бүтээл гэгддэг.. хөгжим нь (дуу) киноныхоо үйл явдал, дүрүүдийг, мөн хөгжилтэй харилцан яриа хийгээд хэмнэлийг тодотгож, сэтгэл татам чанарыг нь нэмнэ.. уг кино тэр оныхоо нэгдсэн улсын хамгийн их ашиг олсон долоо дахь кино болсон агаад мөн бүх цаг үеийн хамгийн шилдэг мянган киноны 592-р байрт жагсдаг.. Samuel Hoffenstein, George Marion Jr. Болон Waldemar Young гэсэн эрхмүүд Paul Armont, Léopold Marchand нарын "The tailor at the castle" хэмээх жүжгийг кино зохиол болгосон бол киноны хөгжмийг Richard Rodgers, дууны үгийг Lorenz Hart нар тус тус бичсэн ба энэ Lorenz Hart Richard Rodgers хоёр хамтран 500 гаран дуу зохиосон Америкийн хөгжмийн зохиолчид бөлгөө.. киноны гол дүрүүдэд: Францын жүжигчин, кабаре дуучин Maurice Chevalier болон Америкийн дуучин, жүжигчин, гучаад онд олон хит кинонд тоглосон Jeanette MacDonald нар тогложээ.. кино хийгдэж байх үед  Maurice Chevalier-ын ээж нь нас барсан агаад уг эмгэнэлт явдал түүний тоглолтод нөлөөлсөн гэдэг.. энэхүү киноны 'Isn't it Romantic?' хэмээх дуу Америкийн кино хүрээлэнгээс гаргасан шилдэг зуун киноны дуу жагсаалтын 73-р байрт жагсдаг ба гучаад оны хамгийн шилдэг мюзикл гэж судлаачид үздэг ажээ..