Төрөлхийн ялагдагч

The Hustler (1961). Нэгэн бильярдны газрын үүдэнд машин ирж зогсох ба машинаас хоёр эр буугаад бильярдны газрын зүг алхлан явж ороод чанга дуугаар өнөөдөр би бүгдийг нь хожно, төдий хэмжээний мөнгө олно хэмээн өөр хоорондоо асар итгэлтэй ярилцацгаах эрс тус газарт байх эрчүүдийн сонирхолыг эрхгүй татахаас гадна уншигч таны сонирхолыг татаж байгаа болов уу гэж найдаад тэднийг танилцуулъя.. тэдний арай залуу бас царайлаг эрийг Eddie \Paul Newman – Оскар болон Канны наадмын шагналт Америкийн жүжигчин бас авто уралдаанч\ гэдэг ба зан араншин нь харин царай шигээ биш буюу хамгийн аугаа бильярдчин болохыг хүсэгч, үүнийхээ төлөө чөтгөрт ч сүнсээ худалдаж чадах бильярдны донтой, мөн мэдээж гайхалтай авъяаслаг бильярдчин бөлгөө.. тэрээр түрэмгий, зөрүүд, онгироогоос гадна өөртөө итгэлтэй ч холыг харж чадах ухаангүй тэнэгдүүхэн эр бол нөгөө эр нь түүний хуурай ах, хамтран зүтгэгч Charlie гэгч болно.. тэд хотоос хот руу бильярд мөрийтэй тоглон аялж явдаг жижиг гарын луйварчид буюу дээд түвшинд тоглодог Eddie өөрийн авъяасаа нууж өөрөөсөө хэд дахин доогуур түвшиний тоглогчдыг мэхлэн мөнгө ологч мэхлэгч бол зөвлөх нь Charlie юм.. тэд энэ бильярдны газрыг хоослохоор ирснээс гадна энэ хотын үнэмлэхүй аварга, арван таван жил босоо байгаа Minnesota Fats \ Jackie Gleason - Америкийн жүжигчин, комедиан, хөгжмийн зохиолч\ гэгчийг буулган авахаар ирсэн бөгөөд тэдэнд мөнгө болон гол нь хамгийн шилдэгийг хожиж шилдэг болох тэсэшгүй хүсэлдээ Eddie шатаж, шөнө ч унтаж чадахаа болиод галзуурах дөхөж байв.. ингээд өрсөлдөгч ирсэн сургаар Minnesota Fats хэмээх бүдүүн эр хүрэлцэн ирсэнээр бильярдын газар их тулаанд бэлдэж, тэр хавийн нөлөө бүхий улс цуглацгаасны дотор Minnesota Fats-ын ивээн тэтгэгч, энэ хотын хамгийн том муу гар Bert \ George C. Scott - Америкийн тайз, дэлгэцийн жүжигчин, найруулагч ба тэрээр Оскарын шилдэг гол дүрийн шагналаас татгалзсан анхны хүн \ бас ирсэн байлаа, энэ Bert амьд чөтгөр буюу түүнтэй холбогдсон хүн сайнаа огт үзэхийн биш..

ийнхүү тулаан эхэлж бильярдны гайхамшигтай ширүүн тэмцээн хайр найргүйгээр хоёр талын ээлжилсэн ялалтаар өрнөх үед Eddie бүдүүн өрсөлдөгчөө хэзээч өмнө нь тулж байгаагүй бильярдчин болохыг ухаарах ба өрсөлдөгчийнхөө хөдөлгөөнийг, ур чадварыг шагшин гайхна.. тэд мэдээж мөрийтэй тоглох агаад цаг явах тусам мөрийний хэмжээ нэмэгдэж байв, ингэсээр шөнө болж хоёр тал бага зэрэг ядарч ирэх бөгөөд Eddie үл ялиг илүү хожоод байх үеэр хоёр тал сэргэх гэж архи ууцгаах ба Minnesota Fats хундагаар аажуу уух бол хожиж эхэлсэндээ сагсуурсан, бас мундаг харагдах гэсэн Eddie шилнээс нь ууж байлаа.. халаад ирсэн Eddie улам мэргэн болж, удаа дараа дарааллан хожиж зэгсэн мөнгөтэй болоход Minnesota Fats-д Bert мөнгө өгөх бол Charlie олсон мөнгөө хангалттай гэж үзээд Eddie-г одоо боль, явцгаая хэмээхэд согтсон, бас нэг мөсөн Minnesota Fats-г буулгаж авахыг хүссэн Eddie үгүй гээд Minnesota Fats-г больё гэсэн үед л болино гэж хэлэх үед өглөө болж байлаа.. ядарсан, согтсон Eddie удаа дараа хожигдож эхлэхэд туршлагатай, хашир Minnesota Fats улам сэргэж, улмаар Eddie-г халаасны л мөнгөтэй үлдээгээд зогсохгүй ухаан алдан унагаана, гэхдээ Eddie ухаан алдах хүртлээ шазуур зуун бууж өгье гэдэггүй.. маргааш нь Eddie үлдсэн жаахан мөнгөнийхөө талыг Charlie-д үлдээчихээд өөрөө автобусны буудал буцахаар явж байгаад нэг хүүхэнтэй танилцаад архиддаг ба тэд өглөө нэг оронд хамт сэрсэнээр жинхэнээсээ танилцах буюу энэ ямар хүүхэн болохыг танилцуулъя: Sarah \ Piper Laurie – гурвантаа Оскарт нэр дэвшиж байсан Америкийн жүжигчин \ гэдэг нэртэй, зүс царай боломжийн энэ хүүхэн энэ хотод амьдардаг ба хазганаж явдагаа багадаа машин мөргүүлсэнийх гээд өөрийгөө урлагийн сургуульд ажилладаг гэнэ, мөн дажгүй амьдардагаа баян хөгшин нууц амрагийнхаа ач буян гэнэ.. Eddie болон Sarah хэдэн өдөр хамт амьдран, янаглалын халууралд автацгаах агаад энэ үеэр Eddie хүүхнийг архичин болохыг олж мэднэ.. нэг өдөр тэдэн дээр Charlie хүрч ирээд жаахан мөнгө үлдсэн, дахин замдаа гаръя гэж Eddie-д хэлэхэд Eddie би Minnesota Fats-г ялах хүртлээ эндээс явахгүй, хэрэгтэй мөнгөө өөрөө эндээс олчихно хэмээгээд Charlie-г харааж ерөөгөөд хөөж явуулна.. Eddie мөрийтэй хөзөр тоглож байгаад Bert-тэй уулзаж танилцах ба Bert түүнийг авъяастай боловч характергүй, гэхдээ надтай хамтарвал чамайг шилдэг болгоно, харин орлогын далан таван хувийг би авна гэхэд амбицтай Eddie зөвшөөрөхгүй.. ингээд Eddie оройгоор бильярдын газраар луйврын аргаараа мөнгө олж яваад хэсэг залууст баригдаад эрхий хуруунуудаа хугалуулж шангаа хүртэх бөгөөд түүнийг Sarah гэртээ байлган асран халамжлах ба энэ хугацаанд тэдний харилцаа үлэмж сайжран хэн хэн нь өмнөхөөсөө нэлээд өөрчлөгдөнө.. эдгэсэн Eddie Bert-ын саналыг хүлээж авахгүй бол Minnesota Fats-тай ахин тоглож чадахгүйгээ ухамсарлан Bert дээр очин саналыг хүлээж авдаг..

 Eddie удахгүй өөр хот руу явж том тоглогчтой тоглох болсноо хийгээд удахгүй буцаад ирэхээ Sarah-д хэлэхэд хүүхэн түүнийг эргэж ирнэ гэдэгт нь огт итгэхгүй байгаагаа, бас баян хөгшин амраггүй, мөнгийг нь аав нь явуулдаг болохыг, мөн төрөлхийн хөл муутайгаа хэлээд хайраа илчлэхэд Eddie түүнийг дагуулж явахаас өөр аргагүй болно.. ийнхүү Eddie, Sarah Bert гурав ойролцоох хотруу хамт явцгаах ба замын туршид Sarah Bert-г муу хүн болохыг, Eddie энэ янзаараа амьдралаа сүйтгэхийг олж таних агаад Bert хүүхэнд далдуур унтах санал тавьсаар байв.. өөр хотод ирээд Bert маш баян бөгөөд бильярдын донтой эрхэмтэй Eddie-г өндөр бооцоотойгоор тоглуулах ба Eddie навсайтлаа хожигдож байх үед Sarah зантайхан ууж байлаа.. Eddie сүнсгүй ялагдаж, Bert одоо боль гээд мөнгө ахиж өгөхгүй гэхэд Eddie өөрийнхөө мөнгөөр тоглоод мөн л хожигдож байхад Sarah хүрч ирээд Eddie-д наадуул чинь чамайг ашиглаж байна, энэ амьдралд чинь ямарч утга алга, чи энэ хэвээрээ хэнд ч хэрэггүй амьтан болох нь гэж хориглоход Eddie тоохгүй бөгөөд харин ч Bert энэ явдлыг ашиглан Eddie-д мөнгө зээлдүүлэх бол Sarah буудалдаа харичихна.. тус мөчөөс Eddie хожиж эхлэх бөгөөд баян эрхэмийг цөлмөнө, ингээд Eddie болон Bert зэгсэн мөнгөжиж Bert шууд таксигаар буудалдаа харих бол Eddie би алхаад харина гэсээр үлддэг.. буудалдаа ирсэн Bert шууд Sarah-ын өрөөнд орж түүнийг эзэмдэх бөгөөд хэзээ хойно Eddie-г ирэхэд хүүхэн амиа хорлосон байлаа.. энэ явдлаас хэсэг хугацаа өнгөрч Eddie Minnesota Fats-тай дахин тулалдахаар ирэх бөгөөд тулаан мөн л удаан үргэлжилсэн ч Eddie бүрэн ялах ба маш их мөнгө хожсон Eddie-г Bert олзныхоо талыг өг эс бөгөөс дээрх шиг хурууг чинь хугалуулна шүү гэхэд Eddie чи намайг гүйцэт алахгүй бол би эргэж ирээд чамайг ална гээд мөн Sarah-ын үхлийг бас ярьснаар Bert бууж өгөн Eddie-г сул тавихдаа дахиж пүүл бильярд тоглохгүй гэсэн тангаргийг нь авдаг.. 

Америкийн кино хүрээлэнгээс уг бүтээлийг хамгийн шилдэг арван спортын драм киноны тоонд нэрлэж, уг бүтээлээс болж нэр хүнд нь унаад байсан пүүл бильярд Америкт дахин сэргэсэн гэдэг.. Оскарын шагналт Америкийн кино найруулагч Robert Rossen өөрийн амьдралаас бага зэрэг оруулан Walter Tevis-ын ижил нэрт романыг Robert Rossen болон Sidney Carroll нар кинонд хөрвүүлсэн бөгөөд кино олон нийтээс, шүүмжлэгчдээс өндөр үнэлгээ авч, эдүгээ модерн классик статустай болжээ.. найруулагч Robert Rossen залуудаа пүүл тоглож мөнгө олдог байсан туршлагаасаа үүдэн зохиолыг хэтэрхий пүүл бильярдын талаар өгүүлэмжтэй болгоод хүнийг, хүний сэтгэлийг орхидуулсан хэмээн охин нь шүүмжилж байсан агаад туршлагатай Sidney Carroll-той хамтарсанаар зохиол бэлэн болжээ.. киноны суурь санаа бол ялсан ч, ялагдсан ч бай гол нь хүн байхын утга ба Robert Rossen киноныхоо талаар: миний гол дүр бол агуу тоглогч болохыг хүсэгч юм, гэвч кино маань үнэндээ өөрийгөө хөгжүүлэх гэж, хүн байх гэж тэмцэж буй хүний тухай ба түүний амьдралд орж ирсэн хүмүүс даанч саад болж түүний баллах бөгөөд гол баатар маань эмгэнэлтэй алдааныхаа дараа л буруу улстайгаа нөхөрлөсөнөө, мөн итгэж явсанаа сэхээрдэг хэмээжээ.. мөрөөдлийнхөө оронд бодит байдлыг буюу ялагдлаа хүлээн зөвшөөрдөг Америкийн цөөхөн кино гол дүрийн нэг гэж судлаачид уг киноны баатар Eddie-г үздэг бөгөөд кинон дээр гарах эрчүүд Eddie-г эс тооцвол дандаа царай муутай, хүйтэн \киноны бүх дүрийг дотроосоо ялзарсан, мөн кинонд сайн дүр байхгүй\ төрхтэй байхад Eddie л ганцаараа царайлаг сайхан байдаг хэдий ч тэрээр энэ муухай, бохир ертөнцөд байх ёсгүйгээ ухааран, улмаар ялагдан буцдаг нь амьдралын бараан, хэрцгий, хайр найргүй шударга бусыг харуулна.. кино маань бүх цаг үеийн хамгийн шилдэг мянган киноны 397-р байрт жагсдаг ба киноны зохиолыг Америкийн кино зохиолчдын холбооноос гаргасан хамгийн шилдэг зуун кино зохиолын 96-р байрт эрэмбэлжээ.. 

кино тэр жилийнхээ Оскарт есөн төрөлд нэр дэвшиж шилдэг тайз засал болон шилдэг зураглаач төрөлд ялалт байгуулсан бөгөөд киноны гол дүрүүдэд Paul Newman \тэрээр анх уг кинонд тоглохоос татгалзаж байгаад сүүлд зохиолынх нь талыг уншаад шууд зөвшөөрсөн байдаг\, Jackie Gleason, George C. Scott, Piper Laurie нар А үнэлгээ авахаар тоглосон гэж шүүмжлэгчид үздэг, үүнд ялангуяа Paul Newman энэ киногоороо холливуудын дээд зиндаад заларсан бол Jackie Gleason, George C. Scott нарын туслах дүрийн сайн тоглолтууд киног улам өргөжээ.. Paul Newman Eddie-ын дүрийг авахаасаа өмнө огт пүүл тоглож байгаагүй ажээ.. ингээд бэлтгэл хийж, мөн чадвараа сайжруулахын тулд гал тогооныхоо өрөөний ширээг авч хаяад оронд пүүл бильярдын ширээ суулгаж өдөр болгон бэлтгэл хийж байжээ.. Ганц хэсгийг үл тооцвол Киноны пүүл бильярдтай бүх зураглалд жүжигчид (Paul Newman болон Jackie Gleason) өөрсдөө бильярдаа тоглоцгоодог ажээ.. Уг кинонд бүтээсэн дүрээрээ Оскарт нэр дэвшсэн Piper Laurie гэр бүлдээ анхаарлаа хандуулж дараагийн кинонд тоглох хүртэл 15 жил болсон ба түүний дэлгэцийн эргэн ирэлт Carrie (1976) бүтээл байсан бөгөөд энэ бүтээлээрээ хоёрдахь удаагаа Оскарт нэр дэвшиж байв..