Ширээний хүүхэн

When a Woman Ascends the Stairs (1960). “Оффисын ажилтай хүүхнүүд орой ажлаасаа тарах үе бол ширээний хүүхнүүд бидний ажилдаа гарах цаг юм” хэмээн өгүүлэх бүсгүй бол манай киноны гол баатар Keiko гэгч бөгөөд гучин настай, бэлэвсрээд таван жил болж буй үзэсгэлэнтэй энэ бүсгүй Токиогийн нэгэн бааранд ширээний хүүхэн хийнэ.. тэрээр нөхрийгөө үхэхэд өөр хүнд хайртай болохгүй, энэ бие махбодио өөр хүнд өгөхгүй гэсэн ам тангараг өргөсөн бөгөөд согтуудаа энэ тангарагаа дотныхоо хүмүүст сайрхан ярьдаг ба үнэхээр ч өдийг хүртэл тангарагтаа үнэнч буй бүсгүй.. Токиогийн шөнийн баарнуудын ерөнхий төрх бол баян, хөгшин, мөн мэдээж гэр бүлтэй эрчүүд архи ууж хөлчүүрэхийн дээр залуухан хүүхнүүдтэй аальгүйтэх юмуу дотно харилцаа үүсгэх бол хүүхнүүд нь аль болох их архи уулган баарандаа хөрөнгө оруулахаас гадна боломжийн эрийн өвөрт орж хэдэн цаас салгахыг чармайна.. Keiko бол уусан шиг уудаг, яриа хөөрөөтэй, аальгүйтэн маяглаж чаддаг, алдартай ширээний хүүхэн боловч хэзээч үйлчлүүлэгчтэйгээ унтаж байгаагүй ба түүнийг бүгд хүндлэхийн дотор баарны менежэр, мөн олон жил хамт ажилласан Komatsu гэгч залуу дотночлон нөхөрлөж, бас битүүхэн хайрлана..

ширээний хүүхний ажил бол залуу насны ажил юм, гучтай Keiko-ын хамтран ажиллагч хүүхэн нь нөхөрт гарахад Keiko-д энэ ажил ирээдүйгүй болох нь гэсэн дохио оюунд нь ирэх бөгөөд мөн хамтран ажиллагч нэг хүүхэн нь бие даан баар ажиллуулах болсоноор түүнд өөрийнхөөрөө шинэ амьдрал эхлүүлэх буцалтгүй, чин зориг төрүүлнэ.. Keiko гаднаасаа бие даасан харагдах ч үнэндээ ямарч эрх чөлөөгүй хүн бөгөөд хөгшин эх болон арчаагүй, сул дорой ах, мөн ахынхаа бие муутай хүүхэд гээд ар гэр рүүгээ ихэнхи мөнгөө явуулах агаад үнэтэй хөлсний байр, үнэтэй хувцас хунарт мөнгөө зориулна.. туршлага болон нэр хүндээ ашиглан Keiko өөрийн гэсэн баар нээхээр төлөвлөх бөгөөд ингэхдээ өөрийн үнэнч үйлчлүүлэгчдээс мөнгө зээлэн бизнесээ босгохыг бодно, ингээд банкны эзэн Fujisaki, үйлдвэрийн эзэн Sekine болон асар баян ч хөгшин Goda нартай уулзаж ярилцахад бүгд л эелдэгээр хүлээн авдаг ч яг мөнгө өгөхгүй ба хөгшин Goda харин Keiko-д хандан: хүссэнийг чинь биелүүлье, харин миний амраг бол гэхэд бүсгүй эрс татгалздаг.. олон жил ширээний хүүхэн хийсэн Keiko-д хамгийн их таалагддаг үйлчлүүлэгч нь Fujisaki ба харамсалтайн энэ эр гэр бүлтэй.. энэ зуур Keiko-ын баар нээсэн найз хүүхэн өрний дарамтаас болж амиа хорлох ба хөгшин Goda-ын саналыг Keiko-ын хамтран ажиллагч найз хүүхэн өөртөө татаж чадах бол олон жил архи уусан Keiko-ын ходоод өвдөн бараг үхэлтэй нүүр тулах үеэр үйлдвэрийн эзэн Sekine түүнийг халамжлан, хайр сэтгэлээ ч илчилж ирэх бөгөөд өвдсөн байсан, нөхөрт гарах хүсэлтэй байсан, мөн дүүгийнхээ бие муутай хүүгийн мэс засалын мөнгөний төлөө Keiko Sekine-ын хайрыг буюу гэрлэх саналыг хүлээж авдаг.. гэтэл уг явдлаас хоёр хонолгүй өөрийгөө Goda-ын эхнэр байна гэсээр нэгэн хүүхэн залгаж, улмаар Keiko тэр эхнэртэй уулзсанаар Goda гэгч нь хулгайч, хуурамч этгээд болохыг олж мэднэ.. азгүйдээ, тэнэгтээ бачимдан уух Keiko Fujisaki-тай тааран хамт айхтар ууцгааж Keiko-нд очин хамт хонох ба энэ секс бол бүсгүйн хувьд хайр, гэр бүл бол Fujisaki би ажлын шугамаар өөр хотруу шилжиж байгаа гээд ширээн дээр нь мөнгө тавичихаад даруйхан хувцаслаад алга болно.. Keiko-ын гэрээс Fujisaki гарахдаа зэрэгцэн менежэр Komatsu орж ирээд ор энэ тэрийг харж бүхнийг ойлгоод Keiko-д хандаж: би чамайг ариун нандин гэж боддог байлаа, би чамайг үнэнч, шударга гэж боддог байлаа гэж хэлээд уурлан Keiko-г хүчиндэх гэж оролддог..

 Akira Kurosawa, Yasujirō Ozu зэрэг Японы шилдэг кино найруулагчдын дараа орохуйц хүндлэгдсэн Mikio Naruse-ын энэхүү бүтээл бол түүний оргил бүтээлийнх нь тоонд ордог ба эрчүүд давамгайлсан, мөнгө л үнэт зүйл болсон нийгэмд эрх чөлөө, аз жаргалынхаа төлөө тэмцэж буй хүүхний түүхийг эл бүтээлд мелодрам жанраар дүрсэлсэн.. Mikio Naruse нас барсаных нь дараа бүтээлүүд нь олон улсад алдаршсан нь ер бусын үзэгдэл болсон бөгөөд суут Akira Kurosawa түүний бүтээлүүдийг “гадаргуун дөлгөөхөн ч гүндээ догшин их мөрөнтэй адилхан” хэмээсэн байдаг.. Mikio Naruse-ын кинонуудынх нь сэдэв дайны дараахь Японы нийгмийн амьдралыг үзүүлэхдээ эмэгтэй хүнийг гол баатараа болгоод уг эмэгтэйн орчин үеийн нийгмийн материаллаг хэрэглээний бэрхшээлээр, нийгмийн шударга бус байдлын улмаас хэрхэн сэтгэл болон бие махбодиор доромжлогдож, шаналан, зүдрэн буйг илэрхийлэн гаргадаг ба энэ кинонд ч мөн тус сэдэв гарна.. киноны гол дүрд Hideko Takamine дэлхийн хэмжээний тоглолт үзүүлсэн бөгөөд тэрээр Mikio Naruse-тэй хамтарсан кинонуудаараа алдартай.. киноны гол дүр Keiko ажилладаг баарныхаа шатаар шөнө болгон өгсөхдөө жигшил нь төрдөг бөгөөд шатаар өгсөөд л мөнгөтэй эрчүүд эмэгтэйчүүдийг секс хэрэглээ гэж хардаг ертөнц рүү орох ба энэ шат бол эл хоёр ертөнцийг холбосон симбол болно.. мөн киноны хоёр ч сцен дээр эрэгтэй дүрүүд секс хийснийхээ дараа дариухан хувцаслаад хүүхнүүдээ орхиж явахыг хүсдэг нь тэдний эмэгтэйчүүдийг огт хүндэлдэггүй, нэг удаагийн хэрэглээ гэж хардаг болох нь ажиглагдана.. киноны төв нь мөнгө, кинон дээрх гарах хүүхнүүд материалист нийгэмд аятайхан, хүн шиг амьдрахын тулд баталгаатай, найдвартай амьдралтай эрчүүдтэй суух гэж зүтгэн тэмцэх, эсхүл баян эрийн нууц амраг болохоос өөр замгүй бөгөөд энэ утгаараа кинон дээр гарах эмэгтэй дүрүүд нь ямарч эрх чөлөөгүй, зах зээлийн эрчүүд давамгайлсан нийгэмд секс хэрэгслэл болж буйг үзүүлсэн гутранги хийгээд үнэн бүтээл ажээ..