Гуталчин охин

Loves of a Blonde (1965). Найз залуугийнхаа гэрэл зургийг орон дотроо найз охиндоо үзүүлэн гайхуулах Andula мөн найз залуугаасаа бэлгэнд авсан бөгжийг үзүүлэн сайрхахад найз охин нь “чи хариуд нь юу өгсөн бэ” хэмээн асуухад Andula юу ч өгөөгүйгээ санан жаахан ичин зовдог.. хорь орчим насны энэ бүсгүй бол манай киноны гол баатар ба тэрээр хуучин социалист Чехословак улсын гутлын үйлдвэр болон охидын сургууль бүхий бцхан тосгонд ажиллаж бас суралцан амьдарна.. энэ тосгон улсын төлөвлөгөөг биелүүлэхээр шаргуу ажиллах агаад бараг дан хүүхнээс бүрдэх буюу арван зургаан эмэгтэйд нэг эрэгтэй ногдох харьцаатай хүүхнүүдийн тосгон болой.. үйлдвэрийн удирдлагаас ажилчин хүүхнүүдийнхээ урам зориг болон сэтгэл санааг өргөх үүднээс тосгоных нь хажуугаар өнгөрөх цэргийн ангийг нэг өдөр тосгондоо зогсоон үдэшлэг зохион хүүхнүүдтэйгээ хамт дуулж, бүжиглүүлж, бас уулгахаар болно.. 

уг үдэшлэгт мэдээж Andula найз охидын хамтаар оролцох бөгөөд тэднийг өөрсдөөс нь нэлээн ах, ахимаг насны гурван ах офицер ойрхон ширээнээс илэрхий ширтэн сээтэн хаяна, сонирхуулахад энэ цэргийн ангийн албан хаагчид бүгдээрээ дундаж насны, гэр бүлтэй эрчүүд байдаг нь инээдтэй.. Andula тэргүүтэй залуу хүүхнүүд буянтай энэ өдөр залуу сайхан эрс хүсэн байтал хөгшин эрчүүд эргүүлэхэд даанч дурамжихан байхад офицерүүд шинэ шөл, соргог бал бурам амтлах энэ боломжийг алдчихгүйг хичээнэ, офицерүүд зөөгчийн дуудан залуу хүүхнүүд рүү дарс илгээх бөгөөд санаа нь бол дарс илгээсэн байхад хүүхнүүд энэ шөнө хүслийг нь хангана гэж тооцоолно.. хөгшин офицерүүд болон залуу хүүхнүүдийн дунд ахимаг насны гурван хүүхэн суух ба офицерүүд тэр гурвыг нэг нүдээр үзэхгүй бол тэр гурван хүүхэн чухам залуусыг хүсэн, ширээнээ уйтгарлан суух бол Andula найзуудын хамт хөгшин офицерүүдээс ичин тэднийг битгий л наашаа зүглээсээ хэмээн залбиран сууцгаана..

гэтэл ёстой хөгтэй юм болно: офицерүүдийн захиалгаар зөөгч дарсыг залуу хүүхнүүдийн ширээнд хүргэж өгөх байтал хөгшин хүүхнүүдийн ширээнд андуураад хүргэчих бөгөөд офицерүүдийн барайсан царай, залуу хүүхнүүдийн гайхах бас шоолох төрх хийгээд хөгшин хүүхнүүдийн баярласныг уншигч өөр өөрийнхөөрөө төсөөлөөрэй.. офицерүүд зөөгчийг зад загнасанаар дарс ширээгээ солих ба залуу хүүхнүүд одоо яах учраа олохгүй тэвдэхэд хөгшин хүүхнүүдийн нүдэнд гомдлын нулимс хурна, харин офицерүүд зоригоо чангалан гударцгааж байв.. дарсыг нь авсан бас ахимаг насны эрчүүдийн шаргуу гуйлтаар залуу хүүхнүүд офицерүүдийн ширээнд дуртай дургүй сууцгаах ба нэг офицер хуруундахь бөгжөө нуух гэж байгаад унагачихна, бөгж өнхөрч явсаар хөгшин хүүхнүүдийн ширээн доогуур орчих агаад доромжлуулсан хөгшин хүүхнүүд хөөрхий офицерийг хэрхэн угтасныг уншигч та бас төсөөлөөрэй.. залуу хүүхнүүдийг офицерүүд хангалттай архи, дарсаар дайлах ба тэд хүслээ биелүүлэхийн тулд хүүхнүүдийг согтоох хэрэгтэй байв, гэтэл хүүхнүүд уусан ч үгүйн дээр зугтаах аргаа өөр хоорондоо ярилцсаар бие засах өрөө ороод ирье хэмээн цаг хожин явахад офицерүүд өөр хоорондоо зориггүй болон тэгсэнгүй, ингэсэнгүй гэж хэрэлдэцгээх бол хүүхнүүд шууд эргэж очоод харилаа гэдгээ хэлье гэж тохирцгооно.. 

эдгээрийг түрүүнээс хойш ажиглаж байсан үдэшлэгийн хөгжимчин буюу төгөлдөр хуурч Milda нөхцөл байдлыг өөртөө ашигтайгаар эргэхийг хүлээж байсан ба залуухан, өнгө зүс муугүй тэрээр зугтааж байсан Andula-ын итгэлийг олоод зогсохгүй жаахан манарсан хүүхнийг уран сайхан үгээрээ, бас мэдээж жаахан хүчирхийллээр өвөртөө оруулчихна.. уусан дарс болон хотын залуугийн гоё үг, зөөлөн харьцаа Andula-г нүцгэлэхэд хүргэх бөгөөд өрөөний цонхны хөшгийг хаах гэж харин Milda шөнийн талыг бардаг хөгжөөнтэй бол залуугийнхаа дор энэ миний насны хайр, энэ миний эр хэмээн итгэн нулимс унагах Andula хөөрхий.. хурьцалын дараа хүүхэн залуугаас хотод найз охингүй биздээ гэж мянгантаа асууж, захиа бичээрэй, хааяа очиж байна шүү хэмээн олон зүйлд “тохиролцох” ба маргааш нь Milda тосгоноос явсанаас хойш сураггүй таг болох агаад хүүхэн бүх юмаа цүнхлээд Milda-ын заасан гэрийнхэн хаяг руу нь давхин очно.. Milda туршлагагүй эр байжээ, тэрээр жинхэнэ гэрийн хаягаа Andula-д заачихсан ба хүүхэн нэг саруулхан орой Milda-ын төрсөн гэрт буюу ээж, аав дээр нь шуудхан орчих бөгөөд огт танихгүй охин цүнхтэйгээ хүүг нь асууж ирсэнд хөгшчүүл мэл гайхаж цэл хөхөрнө.. бараг хөдөөнөөс бүх юмаа цүнхлээд хүүгийн зорин ирсэн охиныг хөөж туух эрх хөгшин эцэг эхэд байсангүй, мөн хүүгийнх нь эхнэр ч болох магадлалтай энэ охиныг яах учраа тэд олохгүй бөгөөд юу ч гэсэн гэртээ хонуулахаар болно.. шөнөжин ууж, хүүхэндсэн Milda бараг үүрээр гэртээ ирээд орон дотор нь хүүхэн унтаж байхыг хараад аймшигтай гайхах агаад ааваасаа энэ хэн бэ? Манай хамаатан юмуу гэж асууна.. Milda-ын ээж хүүгээ танихгүй хүүхэнтэй унтуулахыг хүссэнгүй өвөртөө унтуулах ба ээж л болсон хойно хүүгээ баахан зэмлэж, ёс суртахуун болон шударга ёсны лекцийг нулимстайгаар унших агаад үүн дээр аав нь зодуур, нүдүүрээр байнга заналхийлнэ.. энэ бүх яриаг Andula хаалганы цаанаас сонсон уйлах ба маргааш нь тосгондоо буцаж очоод хотод сайхан байсан, миний найз залуугийн эцэг, эх их сайн хүмүүс байна лээ гэдэг.. 

Чехийн кино урлагийн шинэ давалгааны классик бүтээл гэгдэх болсон энэ бүтээл суут Milos Forman-г Оскарт анхлан нэр дэвшүүлсэн ба уг комеди драм бүх цаг үеийн хамгийн шилдэг мянган киноны 572-р байрт жагсдаг.. Milos Forman киноныхоо санааг болсон явдлаас сэдэвлэсэн бөгөөд уг кинондоо мэргэжлийн бус жүжигчид тоглуулаад зогсохгүй тэднийг импровизацлан байгаагаар нь тоглуулжээ.. кино бүх талаараа баримтад киноны хэлбэрээр зураглагдсаны дээр жүжигчдийн импровизацласан тоглолт энэхүү бүтээлийг бодитой, жинхэнэ мэт сэтгэгдэл төрүүлнэ.. түрүүн хэлсэнчлэн кино мэргэжлийн бус жүжигчдээр амилсан ба кинонд тоглосон хүмүүсийн ихэнхи нь энэ киног бүтээгчдийн найз юмуу хамаатан садан байсан агаад Andula-д тоглосон Hana Brejchová нь Milos Forman-ын хамаатны охин байсан бол Vladimír Menšík, Vladimír Pucholt хоёр л мэргэжлийн жүжигчин байсан бөгөөд Milda-д тоглосон Vladimír Pucholt амьдрал дээр хүүхдийн эмч болсон байдаг.. судлаачид уг киноны ухвар санааг дарангуйлсан нийгмийн элэглэл болон гуниг гэдэг бөгөөд ерөнхийдөө уг киноны хэлэх гэсэн санаа бол залуу насны тогтмол бус хайр, дундаж насныхны бухимдал болон төөрөгдөл, мөн залуу хөгшин гэсэн үе хоорондын зөрөөг үзүүлжээ..

НЭМЭЛТ: Кино судлаач Питер Хэмес найруулагч Милош Форманы замналын турш байнга байж ирсэн гурван сэдвийг эл бүтээлд ч байгааг олж харжээ; залуу насны зуурдын хайр, дундаж насны төөрөгдөл ба цөхрөл, үе хоорондын зааг. Тэгвэл өөр нэг голлох сэдэв бол дарангуйлагдсан нийгмийг тойрсон секстэй холбоотой ичгүүр болон төөрөгдөл аж. Мөн ихэнх шүүмжлэгчид кинонд тоталитар дэглэм дэх өдөр тутмын амьдралын харуулсан хошин ба гунигтай нэгдлийн тухай тайлбар өгдөг. Харин зарим нь, кинонд тусгасан санаа бол зөвхөн төрийн буруугаас бус харин хувь хүмүүс өөрөө өөрсдөдөө тусгаарлалт бий болгодог гэдгийг бас онцолжээ.