Баяр хүргэе! Би чамд хайртай

A Man and a Woman (1966). Парисаас нэлээд зайтай  Deauville гэдэг газарт хүүхдийн дотуур байртай сургууль оршино.. уг сургуульд хүүхдүүдээ харах завгүй, ажил төрөлдөө нухлагдсан эцэг эхчүүд хүүхдүүдээ сургаж амралтын өдрөөр очиж аван эцэг эхийн дүрдээ ахин хувирцгаана.. бороотой нэгэн үдэш Anne болон Jean-Louis хоёр хүүхдүүдтэйгээ хамт байх амралтын өдөр нь дуусан хүүхдүүдээ сургуульд нь хүргэж өгчихөөд буцахдаа зам нийлэн парис руу хамт явах буюу Jean-Louis машинаараа Anne-г хүргэж өгөнгөө танилцаж байгаагаар эл бүх цаг үеийн хамгийн гайхалтай нэгэн романтик киноны нэг маань эхэлнэ.. тэд гуч гараад дөч хүрч яваа бүхэн юм нь жигдэрсэн, төлөвширсөн, нэг үгээр бол ид ирэн дээрээ байгаа тамирчид шиг насан дээрээ яваа ганц бие ээж, аавууд ба үр хүүхдүүд нь ч долоо, найм орчим насны чацуугаас гадна нэг сургуульд сурдаг болохыг тэр нэгэн үдэш үзэгч бид Jean-Louis, Anne хоёртой хамтдаа мэднэ.. зам урт, цаг удаан явна, Jean-Louis хүүхнээс охиных нь талаар асууж байгаад аажмаар хувийн амьдрал руу нь орж дөнгөх бөгөөд Anne охиноо баахан магтах ч өшөө ч олон цагаар ярьж чадах нь нүднээс нь илрэхийн дээр нөхрөө хорвоогийн хамгийн сайн эр, сайхан залуу гэж магтахдаа аман дээр бяцхан гунигийн үрчлээ тодорно..

таны нөхөр төгс юмаа гэж Jean-Louis хүүхнээс асуухад Anne тиймээ, тэр минь наддаа төгс хүн байсан гэдэг.. Anne шударга, илэн далангуйн дээр байгалиас заяасан сэтгэл татам энхрийхэн, гуа үзэсгэлэнтэй хүүхэн бөгөөд энэ насных нь цор ганц хайр гэж боддог нөхөр нь золгүй байдлаар нас нөгчжээ.. түүний нөхөр киноны орлон тоглогч байсан бол Anne өөрөө кино зохиол хянагч байсан ба тэдний хайрын сэтгэл богинохон ч чанартай, жаргалтай, урт жаргалгүй амьдралаас дээр байсан болов ч нөхөр нь гэнэт үхсэнээр Anne охинтойгоо амьдрах болжээ.. Jean-Louis-г харсан ямар ч хүүхэн түүний сайхан төрх, боловсон хандлагад татагдахаас гадна зоримог, авхаалжтай чанарыг нь үнэлнэ.. яриа халууран, зам дундаа орж байхад Jean-Louis өөрийгөө хуримлаж байсан гэхэд Anne эргэлзэнгүйгээр та хуримлаж байсан юм шиг харагдахгүй байна гэдэг..  Jean-Louis-ын эхнэр бас үхжээ.. Jean-Louis авто уралдааны жолооч байсан ба уралдааны үеэр маш хүнд осолд орж бараг үхээд боссон агаад нөхрөө үхчихлээ гэж айсан эхнэр нь айдас, шаналлаа дийлэлгүй амиа хорлосон нь маш харамсалтай.. одоо тэрээр авто уралдааны тест жолооч бөгөөд хүүгийн хамт амьдарч буй.. хайрын хагацал хийгээд ганцаардлын халуунд шатсан тэдний зүрх, бие мах бодь энэхүү буянт урт замын турш бие биесээ ойлгохын цаагуур ойлгож, чин сэтгэлийн итгэлцэлээс үүссэн баярт хөөрөлдөөн, яриандаа хоёр биеэ сонжин харахад дурлалын аагьтай агаарыг бүх судсаараа гүйлгэн авч байсан юмаа.. 

Anne хүссэн газартаа ирэхэд Jean-Louis түүнд хандаж дараагийн амралтаар хүүхдүүд дээрээ хамт очьё гэх санал тавиад зөвшөөрөл авах ба хүүхний ичингүйрэл, залуугийн шийдмэг араншин нь нандин, жинхэнэ хайрын урьдач бэлгэдэл биш гэж үү.. Jean-Louis гэртээ ирэхэд орон дээр нь нэг хүүхэн унтаж байна, тэрээр хүүхнийг зөөлхөн сэрээгээд би чамд дуулгах муу мэдээтэй гэж хэлдэг.. дараагийн амралтын өдрөөр тэд хүүхдүүдийн хамт хоолонд орж, завиар зугаалан сайхан өнгөрүүлнэ, өөрөөр хэлбэл тэд нэг гэр бүл болчиход төгс зохицмоор ажээ.. энэ өдрүүдэд Jean-Louis, Anne хоёрын харилцаа, бие биесээ хүсэх мэдрэмж ямар хурдтай өссөнийг асуух хэрэггүй.. авто уралдааны томоохон тэмцээнд Jean-Louis орохоор болж олон хоногоор аялан явах болох ба ядаж байхад энэ үед цаг агаар туйлын муудсан нь Anne-ын санаа сэтгэлийг зовоон тэрээр зурагт болон сонины мэдээг алгасалгүй чих, хараа тавин анхаарна.. аз болж Jean-Louis уралдаанаа амжилттай дуусгах агаад үүнд баярласан Anne баяр хүргэе, би чамд хайртай гэсэн шууданг бодон бодон байж эцэслэн шийдээд Jean-Louis руу явуулах ба өөр хотод байсан Jean-Louis шууданг хүлээж аваад хүүхэд шиг баярлан шууд машиндаа суун парис руу, Anne руугаа явна.. эмэгтэй хүн үнэхээр хайртай хүндээ л тэгж шууд хэлнэ, би явж очоод яг яах билээ, гэнэт очихоор яаж хүлээж авах бол, очоод хаалгын хэдэн удаа тогшихуу гээд тэрээр есөн шидийн юм бодож байгаад нэг мэдэхэд Anne-н гэрт хүрч очих ба даанч хүүхэн гэртээ байхгүй, охиныхоо сургууль руу явсан болохыг жижүүр нь хэлнэ.. тэрээр сургууль дээр олон цаг явж байж очиход тэнд Anne өөрийн охин болон Jean-Louis-ын хүүтэй тоглон байх агаад тэр дөрвөл ямар сэтгэл хөдлөм тэврэлдэн уулзсаныг зөвхөн уран зураач л бүрэн илэрхийлж чадах болов уу.. ингээд хүүхдүүдээ сургуульд нь оруулчихаад Jean-Louis Anne хоёр ойрхон буудалд орох ба секс халуухан, нойтон эхлэх ч ид дундаа ороход Anne нөхрөө бодон, Jean-Louis-ын үнсэлт, хүрэлт, түлхэлт болгон нөхрийг нь сануулж, нөхрөөсөө урвасан юм шиг санагдах бол харин Jean-Louis-г өөрөөр нь хүлээж авч чадахгүйгээ ухаарах хэдий ч тэвчсээр сексийг дуусгана, Jean-Louis тэнэг, мэдрэмжгүй хүн биш болохоор хүүхнээс яачихав гэхэд Anne миний нөхөр гэхэд тэр чинь үхчихсэн шүүдээ гэж залуу хэлэхэд Anne надад бол үхээгүй ээ гэж хэлээд хувцасладаг.. 

хүний нэг насны амьдралд олон дурлал, олон секс учрал, бас олон хайр тохиолддог ч хүн жинхэнэ хайр ганцхан, тэгэхдээ цэвэр ариун дурлалаа үргэлж санаж байдаг ба үүнээ сэвтүүлэх юмуу орлуулахыг барагтаа зөвшөөрдөггүй, тэгүүлэх ч боломжгүй бизээ.. гэхдээ хэдий төгс юмуу бишрэм хайр байгаад тэр нь боломжоо алдан өнгөрсөн бол түүнээ сайхан дурсамж болгон үлдээгээд цааш аялах хэрэгтэйг эл бүтээл хэлжээ.. мөн хүний дурсамж, өнгөрсөн амьдрал, нэн ялангуяа өнгөрсний хайр хичнээн хүчтэйг Anne-аас харж, тэр бас бидний сүүдэрт дарагдсан дурсамжыг сэргээнэ.. Францын кино найруулагч Claude Lelouch-ын энэхүү бүтээл тэр жилийнхээ Канны кино наадмын дээд шагнал хүртээд зогсохгүй оскараас шилдэг гадаад хэл дээрх кино болон шилдэг кино зохиол шагналыг хүртсэн мундаг кино.. найруулагч маань кино зохиолоо өөрөө бичсэн бөгөөд машинд унтаж байгаад сэрээд далайн эрэг дээр охинтойгоо яваа эмэгтэйг хараад киноныхоо санааг олсон байдаг.. кино маань дурсамж болон одоо гэсэн үзэгдлээр ээлжлэн, сөөлжлөн өрнөхдөө хар-цагаан, бор хүрэн, өнгөт гэсэн гурван өөр өнгөөр байнга солигдох нь киног бодролын, дурсамжын, одоо буюу ирээдүйн цагийн яруу найраглаг, хайрын амт шиг тодорхойгүй зүүд зэрэглээ төрүүлнэ.. киноны хөгжмийг Францын алдарт киноны хөгжим зохиогч Francis Lai бичсэн бөгөөд эл киноны хөгжим яриа байхгүй хамгийн романтик, сэтгэл уярам кино хөгжмийн нэг билээ.. гол дүрүүдэд: Канны наадмын шагналт Францын жүжигчин Jean-Louis Trintignant болон Канны кино наадмын шагналт, 70 гаруй кинонд тоглосон, цаг үеийнхээ шилдэг кино найруулагчтай ажиллаж байсан Францын жүжигчин Anouk Aimée тогложээ.. киноны секс сцен магадгүй кино урлагт тохиосон хамгийн уран яруу, бодлогшруулсан сцен бизээ..